پاراخ (پژواک ۱۱ سلواغه ۱۴۰۲): پنجشېر کې په دیارلسم ځل د دغه ولایت له کانونو استخراج شوي ۲۸۶۷ قیراطه زمرد په ۲۹۶ زره او ۷۵۰ امریکايي ډالرو د داوطلبۍ له لارې وپلورل شول.
د پنجشېر د کانونو او پټرولیم رییس محمدقاسم امیر پژواک خبري اژانس ته وویل چې د زمردو په دیارلسم ځل پلور کې له پنجشېر، کابل، کاپیسا، اروزګان، ننګرهار، نورستان او پروان ولایتونو ۸۰ سوداګرو ګډون کړی و.
هغه وویل چې دغه زمرد د پنجشېر د لومړۍ حصې ولسوالۍ له لسو کانونو استخراج شوي وو.
پنجشېر کې له کانونو شاوخوا دوه کاله د زمردو پر استخراج بندیز لګېدلی و، خو سږ کال د زمري میاشتې په وروستیو کې یې بېرته استخراج پیل شو چې تر اوسه د داوطلبۍ له لارې په دیارلس پړاوونو کې پلورل شوي دي.
د پنجشېر د کانونو ریاست وايي چې په تېرو ۱۲ پړاوونو کې د دوه میلیون او اتهسوه زره امریکايي ډالرو په ارزښت زمرد پلورل شوي دي.
د پنجشېر د کانونو ریاست د معلوماتو پر بنسټ، په دغه ولایت کې د زمردو د ثبت شوو ټولو کانونو شمېر ۱۲۵۰ ته رسیږي چې له ډلې یې د ۳۵۰ کانونو د استخراج چارې روانې دي او څه باندې اووه زره کسانو ته په کې د کار زمینه برابره شوې ده.
GET IN TOUCH
NEWSLETTER
SUGGEST A STORY
PAJHWOK MOBILE APP