بدخشان کې د ترافیکي پېښو له امله دوه کسان مړه او اته نور ټپیان شوي

[restrict paid="true"]

فیض‌اباد (پژواک، ۱۵ سلواغه ۱۴۰۲): د بدخشان ځايي چارواکي وایي چې د دغه ولایت په مرکز فیض‌اباد او بهارک ولسوالۍ کې د دوو ترافیکي پېښو له کبله لسو کسانو ته مرګ‌ژوبله اوښتې ده.

د یاد ولایت د ترافیکو مدیر قاري ګلب‌الدین وایي چې د فیض‌اباد ښار په پنځمه حوزه او د بهارک ولسوالۍ په قلاتک سیمه کې ترافیکي پېښې رامنځته شوې چې په کې ۲ کسان مړه شوي او ۸ نور ټپیان شوي دي.

نوموړي وویل دغه پېښې د موټرچلوونکو د بې احتیاطۍ له امله رامنځته شوې دي.

باید وویل شي چې دې وروستیو کې په هېواد کې د ترافیکي پېښو په کچه کې لوړوالی راغلی دی.

د پژواک د راپورونو له مخې، د سږ کال په اوږدو کې په بېلابېلو ترافیکي پېښو کې شاوخوا څلورو زرو کسانو ته مرګ‌ژوبله اوښتې ده.

[/restrict]