هرات (پژواک، ۱۸ سلواغه ۱۴۰۲): هرات کې ځایي مسوولین وايي، د دغه ولایت د کروخ ولسوالۍ د «مسجد چوبي» ډبروسکرو کان د کیندلو چارې د ۱۵ میلیون افغانیو په ارزښت یوه خصوصي شرکت ته وسپارل شوې.
د مسوولینو په وینا، یاد کان چې څه باندې یو کیلومتر مساحت لري د هرات د کروخ ولسوالۍ په «مسجد چوبي» سیمه کې موقعیت لري او نن د محلي ادارې د استازو، د هرات د کانونو او پټرولیم رییس او د سیمې یو شمېر اوسېدونکو په شتون کې یوه قراردادي شرکت ته چې مخکې د هېواد په مرکز کې د ازادې سیالۍ له لارې ګټونکی اعلان شوی و، وسپارل شو.
د هرات د کانونو او پټرولیم رییس فضلاحمد منیب خاموش پژواک خبري اژانس ته وویل، کانونه د یوه هېواد اقتصادي ودې لپاره له اړینو څانګو څخه دي چې له امنیت وروسته دویم مقام لري.
نوموړي زیاته کړه، د مسجد چوبي د ډبروسکرو کان د کانونو او پټرولیم وزارت له لورې داوطلبۍ ته وړاندې شوی و چې د بلال خالد شرکت په کې ګټونکی شو او ټاکل شوې چې دغه شرکت به په دغه کان کې ۱۵ میلیون او ۲۱۸ زره افغانۍ پانګونه کوي.
هغه زیاته کړه: «د حکومت له لورې د یو ټن ډبروسکرو قرارداد په ۲۲۰۰ زره افغانۍ شوی او موږ هڅه کوو څو د یاد ولایت نور کانونه هم سروې او ګټې اخیستنې ته وسپارو.»
بلخوا، د قراردادي شرکت رییس حافظ احمدالله اغا وویل، د کان کیندلو فعالیت ترڅنګ یې د دغه ولایت نورو پراختیايي فعالیتونو ته هم پاملرنه کړې او دې سیمه کې به اوسېدونکو لپاره جامع جومات، د اوبو رسولو شبکه او مواصلاتي لار هم جوړه کړي.
هغه زیاته کړه، د ډبروسکرو کان د کار په پیل سره به سلګونه کسانو ته د کار زمینه برابره شي او هڅه روانه ده څو د پروسس پړاوونه یې هم ترسره کړي.
بلخوا، د کروخ ولسوالۍ یوه اوسېدونکي حاجي محمد خپلې سیمه کې د ډبروسکرو کان د کیندلو په اړه د خوښۍ په څرګندولو سره وویل، د سیمې خلک د ډبروسکرو کان د کیندلو برخه کې دغه شرکت او د حکومت د زیربنايي پروګرامونو سره ملاتړ برخه کې هر اړخیزه مرسته کوي.
د کروخ ولسوالۍ په مسجد چوبي کې د ډبروسکرو د کان تسلیمي یوازې د یوې معدني پروژې په توګه نه، بلکې د اقتصادي پرمختګ د یوه فرصت په توګه او د سیمې د خلکو د ژوند شرایطو ښهوالي لپاره یوه د پام وړ پروژه ده چې د دغه ولایت د ځایي چارواکو په خبره، تمه کېږي څو د یاد کان په کېندلو سره به دې ولسوالۍ کې اقتصادي شرایط هم ښه شي.
Views: 6
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن