بلخ کې یو کس له جوماته د بوټانو غلا کولو په تور نیول شوی

مزارشریف (پژواک، ۱۹ سلواغه ۱۴۰۲): د بلخ امنیتي مسوولین وایي، مزارشریف ښار کې یې یو هغه کس نیولی چې له جوماتونو څخه به یې د خلکو بوټان غلا کول.

د بلخ د امنیه قوماندانۍ ویاند محمداصف وزیري وایي چې د مزارشریف ښار د څلورمې امنیتي حوزې پولیسو تېره شپه یو هغه کس نیولی چې له جوماتونو څخه به یې د خلکو بوټان غلا کول.

د وزیري په وینا یاد کس پر خپل جرم اعتراف کړی او د نورو څېړنو په موخه اړوندو ارګانونو ته سپارل شوی دی.

د یادونې ده چې تېره یوه اونۍ هم بلخ کې د څلورو ښځو په ګډون ۲۰ کسان د غلا، قمار او اخلاقي فساد په تور نیول شوي وو.