بامیان (پژواک، ۲۸ سلواغه ۱۴۰۲): د بامیان ورزشي مسوولین وایي چې په دغه ولایت کې د وزلوبې سیالۍ د یکاولنګ لومړي نمبر ولسوالۍ د چاپاندازانو په اتلولۍ پای ته ورسېدې.
د بامیان د بدني روزني سرپرست امر سید کفیل موسوي پژواک خبري اژانس ته وویل، د وزلوبې یادې سیالۍ چې د بامیان مرکز، د لومړي نمبر یکاولنګ او دویم نمبر یکاولنګ ولسوالیو چاپاندازانو ترمنخ ترسره شوې، د یکاولنګ لومړي نمبر ولسوالۍ په اتلولۍ پای ته ورسېدې.
د هغه په خبره، دا سیالي تېره ورځ د یکاولنګ لومړي نمبر ولسوالۍ د چمن سیمه کې د درېیو ټیمونو د ۳۸ چاپاندازانو او ۴۰ اسونو په ګډون ترسره شوه. د دې سیالۍ موخه د غوره چاپاندازانو پېژندنې او دغه ورزش برخې ته د ځوانانو هڅونه وه.
خو چاپاندازان د امکاناتو له نشتوالي او د دې برخې له ورزشکارانو د اړوندو بنسټونو له نه ملاتړه شکایت لري.
د دې سیالۍ یو چاپانداز نادر محمدي وایي چې دې دودیزې لوبې ته د سیمې اوسېدونکو لېوالتیا ډېره ده، خو د سیالیو ترسره کېدو په موخه د مناسب ځای نشتون او د مسوولینو نه ملاتړ د دې لامل شوی څو د چاپاندازانو شمېر ورځ تر بلې کم شي.
د هغه په خبره، که له چاپاندازانو ملاتړ ونه شي، وزلوبه چې په بامیان کې یوه دودیزه لوبه ده، له پامه به وغورځول شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن