کابل (پژواک، ۲۹ سلواغه ۱۴۰۲): د افغانستان د اوسپنې پټلۍ ادارې سرپرست په مشرۍ یوه پلاوی د افغان- ټرانس غونډه کې د ګډون او دوه اړخیزه رېلي همکاریو د پراختیا په موخه د ازبکستان تاشکند ته ولاړ.
د افغانستان، ازبکستان او پاکستان اوسپنې پټلۍ (افغان – ټرانس) – چې ۷۸۰ کیلومټره اوږدوالی لري او د افغانستان له خاورې مرکزي اسیا له سوېلي اسیا سره نښلوي – په افغانستان کې له مزارشریفه پیل او د جلالاباد تر تورخم ښارګوټي پورې رسېږي.
د افغانستان اوسپنې پټلۍ ادارې د معلوماتو له مخې، د دې پروژې لومړنۍ ساحوي سروې تېر کال په زمري میاشت کې بشپړه شوې ده.
د اوسپنې پټلۍ ادارې په خبرپاڼه کې راغلي چې د یادې ادارې سرپرست ملا بختالرحمن شرافت او مل پلاوي د افغان- ټرانس غونډه کې د ګډون او دوه اړخيزه رېلي همکاريو د پراختيا په موخه د ازبکستان پلازمېنې تاشکند ته سفر وکړ.
خبرپاڼه کې راغلي، د دغه سفر په ترڅ کې د افغانستان د اوسپنې پټلۍ سرپرست او مل پلاوي د حيرتان اداري تعمير له رغنیزو چارو او ازبکستان د ترميز رېل پټلۍ سټېشن له بېلابېلو برخو څخه هم ليدنې کړې دي.
د خبرپاڼې د معلوماتو له مخې، ټاکل شوې چې د افغان- ټرانس پروژې راتلونکې غونډه سبا د فبرورۍ په ۱۹مه د ازبکستان په پلازمېنه تاشکند کې د افغانستان، پاکستان، ازبکستان او عربي متحده اماراتو د استازو په ګډون جوړه شي.
Views: 33
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن