غزني کې د انساني وېښتانو پېرلو په تور ۲۵ کسان نیول شوي

غزني‌ښار (پژواک، ۳۰ سلواغه ۱۴۰۲): د غزني د امربالمعروف ریاست وایي چې د دغه ولایت په مقر ولسوالي کې یې د انساني وېښتانو پېرلو په تور ۲۵ کسان نیولي دي.

د غزني د امربالعروف او نهي عن‌المنکر رييس مولوي محمدعالم ناصح پژواک خبري اژانس ته وویل چې تېره ورځ یې محتسبینو د مقر ولسوالۍ په مربوطاتو کې د انساني وېښتانو پېرلو په تړاو ۲۵ کسان نیولي دي.

هغه زیاته کړه چې نیول شوي کسان ټول د ننګرهار ولایت اوسېدونکي دي او پېرلي وېښتان یې په خریطو او بالښتونو کې ځای پر ځای کړي وو.

د نوموړي په خبره چې پخوا یې هم د دغه کاروبار په تور یو شمېر کسان نیولي وو خو د ضمانت له اخیستو وروسته یې بېرته خوشي کړل خو ویې ویل چې تازه نیول شوي کسان یې عدلي او قضايي ارګانونو ته سپارلي دي.

د اسلامي امارت مسوولینو معلوماتو له مخې، په هېواد کې د انساني وېښتانو پر پېر، پلور، صادراتو او واردات بندیز لګېدلی دی.

دا په داسې حال کې ده چې دوه ورځې مخکې هم د  غزني په مقر او اندړو ولسوالیو کې ۱۲ کسان د وېښتانو پېرلو په تړاو نیول شوي وو.