پاکستان کې ایتلافي حکومت جوړېدل؛ شهباز شریف به لومړی وزیر او زرداري به ولسمشر وي

[restrict paid="true"]

اټلانټا (پژواک، ۲ کب ۱۴۰۲): د پاکستان په پارلماني ټاکنو کې هیڅ ګوند اکثریت نه دی ترلاسه کړی، له دې امله مسلم‌لیګ ن او پیپل ګوندونو د ګډ ایتلافي حکومت جوړولو اعلان وکړ.

د پاکستان په تېرو پارلماني ټاکنو کې د ولسي جرګې له ۲۶۰ څوکیو د عمران خان تحریک انصاف ګوند ۹۲، د مسلم‌لیګ ن ګوند ۷۹ او د پیپل ګوند ۵۲ څوکۍ وګټلې او ځینو نورو وړو ګوندونو هم یو شمېر څوکۍ ګټلې دي.

د پاکستان د ټاکنو قانون له مخې، یو ګوند یا اتحاد د حکومت جوړولو لپاره باید د ولسي جرګې ۱۷۱ څوکۍ ولري خو هیڅ ګوند دومره څوکۍ نه دي ترلاسه کړې.

د مسلم‌لیګ او پیپل ګوندونو مشرانو له څو ورځو مذاکراتو وروسته د سه شپې په ورځ ناوخته اعلان وکړ چې دوی په ګډه له نورو وړو ګوندونو سره یوځای ۱۷۱ څوکۍ پوره کړي او ګډ ایتلافي حکومت به جوړوي.

د مسلم‌لیګ ګوند مشر شهباز شریف د پیپل ګوند له مشرانو اصف زردراي او بلاول بوټو سره په یوه ګډ خبري کنفرانس کې وویل چې د موافقې له مخې، په مرکز، پنجاب او بلوجستان ایالتونو کې به دوی ګډ حکومتونه جوړوي.

بلاول زرداري وویل، د موافقې له مخې به شهباز شریف لومړی وزیر او اصف علي زرداري ولسمشر وي، دغه راز د سنا مشري به د پیپل ګوند او مرستیال یې د مسلم لیګ ن ګوند، د ولسي جرګې مشري به د مسلم لیګ ګوند او مرستیال به یې د پیپل ګوند وي.

دغه راز په پنجاب کې به مسلم لیګ او سیند کې پیپل ګوندونه یوازې حکومت جوړوي، خو د پنجاب ګورنر یا والي به د پیپل ګوند او د سیند ګورنر یا والي به د مسلم لیګ ن یا د کډوالو ملي خوځښت (ایم کیو اېم) سره وي.

په بلوچستان کې به هم مسلم لیګ او پیپل ګوند ګډ حکومت جوړوي، وزیر اعلی یا مشر وزیر به د پیپل ګوند او والي یا ګورنر به د مسلم لیګ ن ګوند سره وي.

[/restrict]