کابل (پژواک، ۳ کب ۱۴۰۲): د راپورونو له مخې، د ترکیې پولیسو په یوه موټر کې ۳۹ ناقانونه افغان کډوال نیولي دي.
انادولو اژانس راپور ورکړی چې یاد شمېر کسان د ترکیې په دوزجه ولایت کې نیول شوي دي.
د راپور له مخې، یاد کډوال په یوه موټر کې د کاغذي دستمالونو کارتنونو کې پټ شوي وو او د دوزجه ولایت په چیلیملي ولسوالۍ کې نیول شوي دي.
سرچینې لیکلي: «د دوزجه ولایت له نشهیي توکو له قاچاق سره د مبارزې ځواکونو او د چیلیملي ژاندرمري ځواکونو عملیاتو پر مهال په اراباجي سیمه کې یو موټر ودراوه او له پلټنې وروسته ۳۹ ناقانونه افغان کډوال چې د کاغذي دسمالونو په کارتنونو کې پټ شوي وو، ونیول شول.»
راپور کې راغلي، یاد کسان له لومړنیو څېړنو وروسته د دوزجه ولایت د کډوالۍ ادارې ته وسپارل شي.
سرچینې زیاته کړې چې د یاد موټر چلوونکی هم د انساني قاچاق په تور نیول شوی دی.
دا په داسې حال کې ده چې د روان کال د مرغومي په ۲۹مه هم د ترکیې په بیټلیس ولایت کې د دغه هېواد د امنیتي چارواکو له لوري ۱۸ افغان کډوال نیول شوي وو.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن