کابل (پژواک، ۷ کب ۱۴۰۲): د بهرنیو چارو سرپرست وزیر د ترکمنستان د بهرنیو چارو له وزیر سره د افغانستان په خاوره کې د ټاپي پروژې د کار عملي پیل، هرات ته د دغه هېواد وارداتي برېښنا زیاتوالي، لاجوردو لاري او د رېل پټلۍ پر پراختیا او په دغه برخه کې د ترکمنستان د پانګونې په تړاو خبرې کړې دي.
د بهرنیو چارو وزارت په خبرپاڼه کې راغلي چې د دغه وزارت سرپرست مولوي امیرخان متقي او مل پلاوي د ترکمنستان د وزیرانو شورا مرستیال او د بهرنیو چارو وزیر رشید مُرَدوف سره وکتل.
سرچېنې لیکلي چې په دې کاري ناسته کې چې دواړو د بهرنیو چارو وزیرانو یې مشري کوله د افغانستان او ترکمنستان پر دوو اړخیزو اړیکو، په عشق اباد کې د افغانستان د دیپلوماتیک حضور د سطحې لوړولو، د افغانستان په خاوره کې د ټاپي پروژې د کار عملي پیل، هرات ولایت ته د ترکمنستان وارداتي برېښنا زیاتوالي، لاجوردو لاري احیا، د افغانستان د رېل پټلۍ پر پراختیا او د ترکمنستان د پانګونې په تړاو هراړخیزې خبرې وشوې.
متقي په دغه لېدنه کې ویلي چې د دواړو هېوادونو ترمنځ د تګ او راتګ زیاتوالی د نژدې او دوستانه اړیکو ښکارندويي کوي او د دوه اړخیزې سوداګرۍ او مالونو انتقالاتو کې د زیاتوالي په موخه باید افغان سوداګرو او ټرانسپورټي پرسونل ته د ترکمنستان د ویزو په ورکړه کې اسانتیاوې راشي.
خبرپاڼه کې راغلی، متقي له ترکمن لوري مننه وکړه چې د افغانستان د رېل پټلۍ پرسونل ته یې معیاري روزنه ورکړې او هیله یې څرګنده کړه چې افغان محصلینو ته د ترکمنستان بورسيې زیاتي شي.
خبرپاڼه کاږي، متقي صاحب د افغانستان په خاوره کې د ټاپي پروژې د کار عملي پیل په تړاو د افغانستان د هر اړخیز چمتووالي په اړه پوره معلومات وړاندې کړل او هیله یې څرګنده کړه چې په نژدې راتلونکي کې دواړه هېوادونه وکولای شي د افغانستان په خاوره کې د ټاپي پروژې د کار عملي پیل پرانیزي.
د متقي په خبره، د افغانستان اسلامي امارت د بهرني سیاست یوه اساسي ستن اقتصادمحوري ده چې په سیمهییز اقتصادي اتصال تمرکز لري او د افغانستان د لویو لارو او رېل پټلۍ جوړول د امارت په لومړیتوبونو کې دي او له ترکمن لوري یې غوښتي چې د تورغنډۍ – هرات ښار او اندخوی – شبرغان پر لور تر مزارشریف پورې د رېل پټلۍ د لیکې د غځولو په برخه کې پانګونه وکړي.
د ترکمنستان د بهرنیو چارو وزیر په خپل وار پر ټولو اړوندو مسایلو له خپله اړخه رڼا واچوله.
ښاغلي رشید مُرَدوف وویل، افغانستان سره یې د هېواد د سوداګرۍ زیاتوالی ستراتیژيک لومړیتوب دی او دواړه ټیمونه به کار وکړي چې ترکمنستان ته د افغان سوداګرو او ټرانسپورټي پرسونل تګ راتګ کې…
بهرنیو چارو وزارت لیکلي، د ترکمنستان د د بهرنیو چارو وزیر مُرَدوف تیاری وښوده چې افغان محصلینو ته د برښنا، رېل پټلۍ، ټرانسپورټ او ګازو په برخه کې بورسيې ورکړي.
مُرَدوف ویلي، هېواد یې د ټاپي پروژې په برخه کې کافي کار کړی دی او ددواړو هېوادونو مشترک ټیمونه به کار کوي ترڅو په لنډ راتلونکي کې افغانستان په خاوره کې د ټاپي پروژې د عملي کار پیل وشي ځکه چې ټاپي لویه پروژه ده او ترکمنستان ته ستراتیژيک اهمیت لري.
د هغه په خبره، د دوی ټیمونه هرات کې کار کوي چې د نورالجهاد سبسټېشن ظرفیت پورته شي ترڅو د هرات ښار شاوخوا سیمو ته برېښنا لا زیاته شي.
هغه زیاته کړې چې د افغانستان پر لور د وسپنې پټلۍ غځونه یې هېواد ته ستراتیژیک اهمیت لري او تورغنډۍ کې د رېل پټلۍ د سټېشن د ظرفیت لوړولو طرحه نهايي شوې ده، دواړه تخنیکي ټیمونه به کار ته ادامه ورکړي ترڅو ژر یې د کار پرانیسته وشي.
د افغانستان بهرنیو چارو وزارت لیکلي چې په دې یو ورځنیو کاري مذاکراتو کې د لاجوردو لارې په پراختیا هم خبرې وشوې او هوکړه وشوه چې په نژدې راتلونکي کې په عشق اباد کې د لاجوردو لار د مسیر پنځه ګونو هېوادونو د استازو ناسته ترسره شي.
سرچېنې د معلوماتو له مخې، په دغه ناسته کې همدا راز غونډه شوې چې په لوړه کچه پر اړوندو برخو ګډ کار ته ادامه ورکړي ترڅو د دواړو هېوادونو د ګټو په برخه کې ستر عملي ګامونه پورته شي.
Views: 40
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن