د خوړو نړۍوال پروګرام: تېره یوه میاشت کې مو افغانستان کې له ۷،۹ میلیون کسانو سره مرسته کړې

کابل (پژواک، ۹ کب ۱۴۰۲): د ملګرو ملتونو د خوړو نړۍوال پروګرام اعلان کړی چې په تېره یوه میاشت کې یې افغانستان کې نږدې له ۷،۹ میلیون کسانو سره د خوراکي توکو او نغدو پیسو مرستې کړې دي.

یاد بنسټ د یوه راپور په خپرولو سره لیکلي چې دغه مرستې د خلکو اقتصادي پياوړتیا، د خوارځواکۍ مخنیوي او د زده‌کړو کیفیت ښه کولو په موخه شوې دي.

یاده مرسته په داسې حال کې شوې چې د خوړو نړۍوال پروګرام د موندنو پر اساس، هره ورځ په افغانستان کې لږ تر لږه ۱۶ میلیون کسان د خوړو نه درلودو اندېښنه لري.

له دې مخکې نړۍوالو مرسته کوونکو بنسټونو په وار وار د بودجې له کمښت او افغانستان کې د بې‌وزلۍ د کچې له لوړېدو خبرداری ورکړی دی.

د خوړو نړۍوال پروګرام څو ورځې مخکې اعلان خبر ورکړی و چې د راتلونکو شپږو میاشتو لپاره په افغانستان کې د خوراکي مرستو او خپلو پروګرامونو پلې کولو لپاره ۷۶۰ میلیون ډالرو ته په بېړنۍ توګه اړتیا لري.