کابل (پژواک، ۱۹ کب ۱۴۰۲): د عدلیې وزارت وايي، د ځمکو د غصب مخنیوي کمېسیون هېواد کې د اهلهنود د غصب شوو ځمکو د څېړنې بهیر پیل کړی دی.
د عدلیې وزارت په خبرپاڼه کې راغلي، د اسلامي امارت د ځمکو د غصب مخنیوي کمېسیون په مرکز او ولایتونو کې د ځمکو د غصب مخنیوي تخنیکي پلاوو ته لارښوونه کړې چې د اهلهنود هېوادوالو غصب شوې او یا هغه ځمکې چې د جعلي وکالتلیکونو په واسطه یې د غصب کېدو احتمال موجود وي، تثبیت او بررسي کړي.
په خبرپاڼه کې ویل شوي، د تخنیکي پلاوي راپور د غصب شوو ځمکو له تثبیت او تشخیص وروسته، د کمېسیون له خوا څېړل کېږي او په دې اړه به لازم تصمیم ونیول شي.
وړاندې لیکل شوي، د ځمکو د غصب مخنیوي کمېسیون او په ولایتونو کې تخنیکي پلاوي به د اهلِهنود هېوادوالو د ځمکو د غصب مسئله په بشپړ دقت بررسي کړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن