ترینکوټ (پژواک، ۲۰ کب ۱۴۰۲): د اروزګان د مخابراتو ریاست مسوولین وایي، دغه ولایت کې یې د مخابراتي خدمتونه پراختیا په موخه روان کال ۱۴۲ نوي سایټونه فعال کړي دي.
د اروزګان د مخابراتو او معلوماتي ټکنالوجۍ رییس مولوي زینالله فاروقي پژواک خبري اژانس ته وویل، د روان کال په څه باندې ۱۱ میاشتو کې یې د دغه ولایت په بېلابېلو ولسوالیو کې ۱۴۲ نوي مخابراتي سایټونه فعال کړي او زیاتوي چې له دې سره مخابراتي خدمتونو ته د خلکو د لاسرسي کچه هم ۸۰ سلنه ته لوړه شوې ده.
هغه وویل: «اوسمهال د اروزګان اتیا سلنه اوسېدونکي له غږیزو مخابراتي اسانتیاوو برخمن دي.»
نوموړي زیاته کړه، د غږیز مخابراتي خدمتونو ترڅنګ د دغه ولایت د مرکز په ګډون د درېیو ولسوالیو اوسېدونکي انټرنېټي خدمتونو ته هم لاسرسی لري.
هغه وایي چې په نورو ولسوالیو کې هم د انټرنېټي خدمتونو فعالولو لپاره له اړوند مخابراتي شرکتونو سره په اړیکه کې دي.
د یاد ریاست د مسوولینو په خبره، اوسمهال یوازې په ترینکوټ ښار او دهراوود ولسوالۍ کې د یو شمېر مخابراتي شرکتونو له لوري د سیمکارتونو د وېش پروسه پیل شوې ده.
ورته مهال د اروزګان یو شمېر اوسېدونکي هم خوښ دي چې دغه ولایت کې مخابراتي خدمات پراخ شوي او د دوی ستونزې ورسره کمې شوې دي.
د خاص اروزګان ولسوالۍ یو اوسېدونکی سیدنبي وایي، په لومړي ځل د دوی په سیمه کې د مخابراتي شبکې سایټ فعال شوی او اوس کولی شي، له موبایل ټیلیفون څخه کار واخلي، خو غوښتنه کوي چې باید انټرنېټي خدمات هم ورته فعال شي.
د یاد ولایت د چورې ولسوالۍ اوسېدونکی محمدولي بیا غوښتنه کوي چې د مخابراتي شبکو د خدماتو مرکزونه دې هم ډېر شي چې وکولی شي، په اسانۍ سره سیمکارتونه ترلاسه کړي.
هغه وایي، اوسمهال یوازې په مرکز کې د سیمکارت ترلاسه کولو او ثبت لپاره خدمات شته چې ګڼهګوڼه ورباندې ډېره ده او دوی اړ دي چې په ورځو – ورځو ورته انتظار وکړي.
Views: 39
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن