[restrict paid=”true”]
اټلانټا (پژواک ۲ وری ۱۴۰۲): د امریکا متحده ایالتونو د کندهار ښار ځانمرګی برید غندلی، بل خوا داعش ډلې د یاد برید مسوولیت پر غاړه اخیستی دی.
د افغانستان لپاره د امریکا ځانګړي استازي ټامویسټ پر اېکسپاڼه لیکلي، امریکا دا ترهګریز برید غندي چې د روژې په مبارکه میاشت کې یې بېګناه وګړي ووژل.
ده زیاته کړې: «موږ د قربانیانو د کورنیو په فکر کې یو او دُعاوې ورته کوو.»
بل خوا، د افغانستان لپاره د امریکا سفارت شارژدافېرې کرن ډیکر هم پر اېکس لیکلي چې دوی ټولې ترهګریزې کړنې، هغه که د کابل په دشت برچي سیمه او یا هم په کندهار کې د نوي کابل بانک مخې ته ترسره کېږې، د یوه بزدلانه عمل په توګه غندي.
هغې زیاته کړې: «زما خواخوږي د قربانیانو له کورنیو سره ده. افغانان باید د روژې میاشت په سوله ییزه توګه او له وېرې پرته ولمانځي.”
په ټولنیزو شبکو کې هم کابل کې د چاودنې په اړه پوسټونه شوي، خو رسمي سرچینو څه نه دي ویلي.
د پنجشنبې سهار د کندهار ښار لومړۍ امنیتي حوزې اړوند د نوي کابل بانک مخې ته ځانمرګی برید شوی چې د مسوولینو په وینا، درې کسان په کې وژل شوي او ۱۲ نور ټپیان شوي دي.
د کندهار له امنیه قوماندانۍ پژواک ته په رالېږل شوې خبرپاڼه کې ویل شوي چې نن سهار اتهنیمې بجې یوه ځانمرګي بریدګر د کندهار ښار د لومړۍ امنیتي حوزې په اړوند سیمه کې د نوي کابل بانک مخې ته د هغو کسانو په منځ کې چاودنه کړې چې بانک ته د خپلو پیسو ترلاسه کولو په موخه په کتار کې ولاړ وو.
بل خوا داعش ډلې د دې برید مسوولیت په غاړه اخیستی دی.
[/restrict]
Views: 72
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن