د څلورو هېوادونو ترمنځ د فوټسال سیالیو کې افغانستان نن له ټایلنډ سره لوبه کوي

کابل (پژواک، ۸ وری ۱۴۰۳): د ټایلنډ په کوربه‌توب د څلورو هېوادونو ترمنځ د فوټسال سیالیو په لړ کې افغانستان نن له ټایلنډ سره لوبه کوي.

د افغانستان فوټبال فدراسیون پر خپله فېسبوک‌پاڼه لیکلي چې د افغانستان فوټسال ملي لوبډله نن له ټایلنډ سره لوبه ترسره کوي.

د فوټبال فدراسیون د معلوماتو له مخې، یاده لوبه د افغانستان پر وخت د مازدیګر پنځه بجې پیلېږي.

دغه راز په دغو لوبو کې د کوربه هېواد ټایلنډ په کډون د اسټرالیا، مالیزیا او افغانستان لوبډلو برخه اخيستې ده.

د معلوماتو له مخې، افغانستان په دغو لوبو کې د جدول په سر کې ځای لري.

د یادونې ده، په دغو لوبو کې افغانستان اسټرالیا ته ماتې ورکړې او له مالیزیا سره یې لوبه مساوي شوې ده.