<p style="text-align: justify;">کابل (پژواک، ۸ وری ۱۴۰۳): د ریاستالوزراء سیاسي مرستیال ويلي چې په اوسنیو شرایطو کې له پاکستانه د افغانانو ايستل د مرستې رسولو پروسه او بشري حالت زیانمنوي او ټینګار یې کړی چې باید له کډوالو سیاسي ګټه وا نهخیستل شي.</p>
<p style="text-align: justify;">د ارګ <strong><a href="https://twitter.com/ARG_1880/status/1772674089972298037">خبرپاڼه</a> </strong>کې راغلي چې د ریاستالوزراء سیاسي مرستیال مولوي عبدالکبير پرون په کابل کې د یوناما د بشري چارو له مرستیال او د افغانستان لپاره د ملګرو ملتونو د بشري او پراختیايي ټولنې له مشر اندریکا راتوت او مل پلاوي سره ولیدل.</p>
<p style="text-align: justify;">خبرپاڼه کې راغلي چې دې لیدنه کې د ریاستالوزراء سیاسي مرستیال وویل، د پرلهپسې وچکالۍ او اسلامي امارت ته د فقر او لوږې په میراث پاتې کېدو له امله افغانان بشري، پراختیايي او د ظرفیت لوړولو برخو کې مرستو ته اړتیا لري.</p>
<p style="text-align: justify;">هغه زیاته کړې، په اوسنیو شرایطو کې له پاکستانه د افغانانو ايستل د مرستې رسولو پروسه او بشري حالت زیانمنوي او ټینګار یې کړی چې باید له کډوالو سیاسي ګټه وا نهخیستل شي.</p>
<p style="text-align: justify;">نوموړي په خپلو خبرو کې له اسیا پراختیایي بانک او نورو بنسټونو وغوښتل چې په افغانستان کې دې خپلې نیمګړې پروژې بشپړې کړي.</p>
<p style="text-align: justify;">خبرپاڼه کاږي، په دې لیدنه کې په کابل کې د یوناما د بشري چارو مرستیال وویل، په افغانستان کې د بشري مرستو رسولو په موخه له مرستندویه هېوادونو د درې میلیارد ډالرو غوښتنې ترڅنګ پلان لري د ظرفیت لوړولو برخه کې هم ترې دوه میلیارده ډالر وغواړي.</p>
<p style="text-align: justify;">نوموړي له پاکستانه د افغان کډوالو د دویمې لړۍ پیلېدو په اړه اندېښنه څرګنده کړه او ویې ویل چې په پاکستان کې مېشتو افغانانو ته باید خپلو مېنو ته د تګ لپاره کافي وخت ورکړل شي او په زور ایستلو ته اړ نه شي.</p>
<p style="text-align: justify;">هغه دغه راز له افغان کډوالو سره د پاکستان د حکومت چلند ناسم او د بشري مرستو پر وړاندې خنډ یاد کړ.</p>
<p style="text-align: justify;">د ملګرو ملتونو دغه چارواکي د کډوالو په اړه د کابل او اسلاماباد ترمنځ پر خبرو اترو د ټینګار ترڅنګ وویل چې نوموړی به په نږدې راتلونکي کې پاکستان ته سفر وکړي او د یاد هېواد له چارواکو سره به د افغان کډوالو په اړه خبرې وکړي.</p>
<p style="text-align: justify;">هغه د کاسا زر سیمهییزې پروژې د پيل په اړه هم د اسلامي امارت هڅې وستایلې او زیاته یې کړه، په افغانستان کې له پانګونې ملاتړ کوي؛ دغه راز د اقتصادي ودې په موخه له افغان او نړۍوالو اړخونو سره خبرې کوي، څو په افغانستان کې بانکي خنډونه لرې شي.</p>
