افغاني سره میاشت کابل کې د رواني او عصبي ناروغانو وړیا درملنه کوي

کابل (پژواک، ۱۲ وری ۱۴۰۳): افغاني سره میاشت په کابل ښار کې د رواني او عصبي ناروغانو د وړیا درملنې له پیلېدو خبر ورکوي.

دغه بنسټ پر خپله اېکس‌پاڼه لیکلي: «افغاني سرې میاشتې له پنځو کلونو د ډېر عمر لرونکو رواني او عصبي ناروغانو د وړیا درملنې لپاره دوه نارینه او ښځینه رواني او عصبي ډاکټران موظف کړي دي.»

سرچینې له هغو کسانو چې په کور کې رواني او عصبي ناروغان لري، غوښتي چې خپل ښځینه ناروغان د وړیا درملنې لپاره د کابل مرستون کې د افغاني سرې میاشتې کلینیک او نارینه ناروغان د افغاني سرې میاشتې ترڅنګ د رواني ناروغانو ساتنې امریت ته بوځي.

په همدې حال کې د دغه بنسټ ویاند مدثر همراز پژواک خبري اژانس ته وویل: «هغه رواني او عصبي ناروغان چې راځي، د افغاني سرې میاشتې له لوري یې وړیا درملنه کېږي.»

سرچینې وویل، د شدیدو ناروغان درملنه د اوږدې مودې لپاره کېږي خو هغه ناروغان چې سخت نه وي، د هغوی درملنه ډېر وخت نه اخلي.

هغه زیاته کړه چې رواني او عصبي ناروغانو ته لازمې مشورې ورکول کېږي او که اړتیا وي نو د درملو له لارې یې هم درملنه کېږي.