ډبلیواېچ‌او له افغانستان سره د څه باندې څلور میلیون ډالرو په ارزښت د روغتیايي کېټونو مرسته کړې

کابل (پژواک، ۱۴ وری ۱۴۰۳): د افغانستان له روغتونونو د سره صلیب کمیټې د مرستو له بندېدو وروسته د روغتیا نړۍوال سازمان ویلي چې په افغانستان کې یې له ۲۵ روغتونونو سره د ۴،۴ میلیون ډالرو په ارزښت د روغتیایي کېټونو او درملو مرسته کړې ده.

دغه سازمان نن پر خپله اېکس‌پاڼه لیکلي چې د دوی له ملاتړ سره روغتونونه ۳،۵ میلیون کسانو ته روغتیایي خدمات وړاندې کوي او دغه‌راز د مړینې کچې په ټيټولو ‎کې مهم رول ولري.

د یادونې ده چې سره صلیب د ۲۰۲۳ کال اګست میاشت کې د افغانستان له ۲۵ روغتونونو سره خپل مالي ملاتړ پای ته ورساوه.

له دې مخکې د روغتیا نړۍوال سازمان د ۱۴۰۲ کال لېندۍ میاشت کې ویلي وو چې د درملو برابرولو او په افغانستان کې له روغتونونو ملاتړ په موخه ۱۸۵ میلیون ډالرو ته اړتیا ده.