کابل (پژواک، ۱۵ وری ۱۴۰۳): د اسلامي امارت مشرتابه په یوه تازه فرمان کې راغلي چې له هټۍوالو (اصنافو) د لوحو فیس دې نه اخیستل کېږي.
دغه فرمان دوه ورځې مخکې (د وري ۱۳مه) صادر شوی دی.
د فرمان لومړۍ مادې په لومړۍ فقره کې راغلي: «له دوکاندارانو (اصنافو) څخه دې لوحې د فیس راټولول منع دي او د هغه له اخیستلو څخه دې ډډه وشي.»
د یادې مادې دویمه فقره کې راغلي: «په ښاروالیو پورې له اړوندو لوحو او له هغو لوحو چې جواز یې د ښاروالۍ له خوا صادر شوی، د فیس راټولول د دغه فرمان لومړۍ مادې په (۱) فقره کې له درج شوي فرمان څخه مستثنی دي.»
د دغه فرمان په دویمه ماده کې راغلي چې یاد فرمان د صدور له نېټې نافذ دی او په رسمي جریده کې دې خپور شي.
د کابل ښاروالۍ استازي نعمتالله بارکزي پژواک خبري اژانس ته دغه فرمان تایید کړ.
هغه وویل: «فرمان ډېر واضح دی، مطابق د دغه فرمان موږ خپلې چارې تنظیموو خو د لا وضاحت لپاره چې کله زموږ تخنیکي جلسه وشوه، بیا به یې نور جزئیات شریک شي.»
د اطلاعاتو او فرهنګ وزارت د رسنیو پر خپرونو د څار پخواني رییس عبدالحق حماد دغه فرمان پر خپله اېکسپاڼه خپور کړی او لیکلي یې دي چې هټۍوالو د لوحو له لوړې ماليې سر ټکاوه، د مشرتابه فرمان راغی، نور به له هټۍوالو د لوحو هيڅ ماليه نه اخيستل کېږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن