په متحده عربي امارتو او عمان کې د سختو ورښتونو او توپان له امله ۲۱ کسان مړه شوي

کابل (پژواک، ۳۰ وری ۱۴۰۳): رسنیو راپور ورکړی چې په متحده عربي امارتو او عمان کې د سختو ورښتونو او توپان پایله کې لږ تر لږه ۲۱ کسان مړه شوي دي.

نیویارک ټایمز نن (پنج‌شنبه، د وري ۳۰مه) راپور ورکړی چې عمان کې د سخت توپان له امله ۲۰ کسان مړه شوي او متحده عربي اماراتو کې هم د سخت باران له امله یو کس مړ شوی دی.

راپور کې عمان د هوا پېژندنې ادارې له قوله زیاته شوې چې یاد توپان د یک‌شنبې په ورځ د العین له سیمې پیل شوی او د سه شنبې په ورځ (د وري ۲۸مه) متحده عربي امارتو ته هم ورسید.

بلخوا، د دوبۍ په ګډون د متحده عربي امارتو په بېلابېلو سیمو کې سخت او بې‌ساري باران د دغه هېواد بېلابېلو سیمو کې د برېښنا د پرې کېدو او الوتنو د ټکني کېدو لامل هم شوي دي.

د دغه توپان او ورښتونو له امله په عمان او متحده عربي امارتو کې دولتي ادارې او ښوونځي ځنډول شوي دي.

د چارو پوهانو به اند، په ځینو عربي هېوادونو کې شدید بارانونه د ځمکې د بې‌سارې ګرمېدو له امله وریږي.