کابل (پژواک، ۳ غویی ۱۴۰۳): د عامې روغتیا وزارت سرپرست د کډوالو په چارو کې د ملګرو ملتونو عالي کمېشنرۍ له استازي سره په لیدنه کې راستنېدونکو کډوالو لپاره د روغتیا په برخه کې د بشپړ چمتووالي ډاډ ورکړی او په دې برخه کې یې د یادې نړۍوالې ادارې د همکارۍ غوښتنه کړې ده.
د عامې روغتیا وزارت په خبرپاڼه کې راغلي چې د دغه وزارت سرپرست ډاکټر قلندر عباد د کډوالو په چارو کې د ملګرو ملتونو عالي کمېشنرۍ (UNHCR) له استازي لیونارد زولو او مل پلاوي سره ولیدل.
عباد په دې ناسته کې ویلي چې عامې روغتیا وزارت راستنېدونکو کډوالو ته د روغتیا برخه کې پوره چمتووالی لري او په دې برخه کې یې له یادې ادارې د همکارۍ غوښتنه کې ده.
عامې روغتیا وزارت لیکلي چې د کډوالو په چارو کې د ملګرو ملتونو عالي کمېشنرۍ مسئولینو په یاده ناسته کې د راستنېدونکو کډوالو برخه کې د همکارۍ ډاډ ورکولو ترڅنګ، راستنېدونکو کډوالو ته د روغتیایي پاملرنې او نوو روغتیایي مرکزونو ایجاد په اړه خبرې اترې وکړې.
د راپورونو له مخې، د تېر میلادي کال له اکتوبر راوروسته له پاکستانه شاوخوا ۵۰۰ زره افغانان په زور را ایستل شوي او د جبري ایستلو دویمه لړۍ د روان لمریز کال د وري میاشتې په ۲۸مه پیل شوه او ټاکل شوې شاوخوا ۸۰۰ زره افغان کډوال له دغه هېواده وایستل شي.
Views: 13
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن