جلالاباد (پژواک، ۵ غويی ۱۴۰۳): ځایي مسوولین وايي، د هلمند په نهرسراج ولسوالۍ کې یو کس او د ننګرهار په مومندرې او لعلپورې ولسوالیو دوه کسان سیندونو کې د ډوبېدو له امله مړ شوي دي.
د ننګرهار امنيې قوماندانۍ ویاند عبدالبصیر زابلی پژواک خبري اژانس ته وويل، د دغه ولايت په مومندرې ولسوالۍ کې يو ماشوم د کابل سیند کې د ډوبېدو له امله مړ شوی دی.
هغه زياته کړه، د ماشوم جسد د ولسوالۍ امنیتي منسوبینو له لوري له اوبو را ایستل شوی، خو تر اوسه یې کورنۍ نه ده موندل شوې.
نوموړي دغه راز وویل چې د بټيکوټ ولسوالۍ مربوطاتو کې هم یو کس د کابل سیند اوبو وړی او جسد يې په لعلپورې ولسوالۍ کې د ځايي خلکو او امنیتي منسوبینو له لوري موندل شوی او کورنۍ ته یې سپارل شوی دی.
دغه راز، د هلمند د والي ویاند مولوي محمدقاسم ریاض پژواک خبري اژانس ته وویل چې تېره ورځ د نهرسراج ولسوالۍ خوشکابې سیمې مربوطاتو کې درې کسان د ارغنداب سیند اوبو کې ډوب شوي وو.
هغه زیاته کړه چې د یادو کسانو له ډلې دوه کسان د سیمې د خلکو له خوا ژغورل شوي او یو کس مړ شوی چې جسد یې له موندلو وروسته خپلې کورنۍ ته سپارل شوی دی.
Views: 31
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن