د پاکستان له زندانونو ۱۵ افغانان خوشي شول

کابل (پژواک، ۱۵ غویی ۱۴۰۳): د کډوالو او راستنېدونکو چارو وزارت وايي، ۱۵ افغانان چې پاکستان کې د قانوني اسناد نه لرلو له امله بندیان شوي وو، خوشي او هېواد ته راستانه شول.

یاد وزارت نن پر خپله اېکس‌پاڼه لیکلي، دغه کسان چې د یاد هېواد په بېلابېلو زندانونو کې له دوو تر ۱۹ میاشتو بندیان وو، د روانې میاشتې په ۱۳مه ازاد او بېرته هېواد ته راوګرځېدل.

د کډوالو چارو وزارت لیکلي: «د ننګرهار ولایت د تورخم سرحدي امریت د معلوماتو له مخې، دغه کسان د قانوني اسناد نه درلودو له امله زنداني شوي وو.»

دا په داسې حال کې ده چې د روان کال د وري په ۱۶مه هم د پاکستان په کراچۍ ښار کې د افغانستان قونسلګرۍ د ۵۴ افغان وګړو له خوشي کېدو خبر ورکړی و.