فراه ښار (پژواک، ۱۸ غويی ۱۴۰۳): د فراه امنیه قومانداني وايي چې د دغه ولایت په بکواه ولسوالۍ کې د عملیاتو پر مهال ۲۳۹ کیلوګرامه نشهيي توکي کشف او ترلاسه شوي دي.
دغه څرګندونې په هغې خبرپاڼې کې شوې چې نن د فراه امنیې قوماندانۍ له لوري رسنیو ته استول شوې ده.
سرچینه وايي چې د نشهيي توکو پر وړاندې د مبارزې مدیریت منسوبینو په تېرو څو ورځو کې د بکواه ولسوالۍ په بېلابېلو ځینو کې عملیات ترسره کړي چې په ترڅ کې یې ۲۳۹ کیلوګرامه بېلابېل ډول نشهيي او کیمیاوي توکي ترلاسه شوي دي.
د خبرپاڼې په حواله، په یادو توکو تریاک، اېف، تېزاب او نور داسې کیمیاوي مواد شامل وو چې د نشهیي توکو په جوړولو کې ترې استفاده کېږي.
سرچینه زیاتوي چې امنیتي ځواکونو ترلاسه کړي یاد نشهيي توکي په سیمه کې سوځولي دي.
خبرپاڼه کې راغلي چې د یادو عملیاتو پر مهال درې کسان له ۴۸ کیلوګرامه تریاکو سره یوځای نیول شوي چې عدلي او قضايي ارګانونو ته سپارل شوي دي.
GET IN TOUCH
NEWSLETTER
SUGGEST A STORY
PAJHWOK MOBILE APP