ننګرهار کې د زونونو په کچه د کرکټ درې ورځنۍ سیالۍ پیل شوې

کابل (پژواک، ۲۹ غویی ۱۴۰۳): افغان کرکټ بورډ وايي، ننګرهار کې یې د پنځو زونونو د لوبډلو ترمنځ د میرویس نیکه جام د کرکټ درې ورځنۍ سیالۍ پیل کړې دي.

د افغانستان کرکټ بورډ د کورني کرکټ څانګې پر خپله فېسبوک‌پاڼه لیکلي، له مهالوېش سره سم د میرویس نیکه جام درې ورځنۍ سیالۍ پرون په ننګرهار کې پیل شوې چې د راتلونکې جون میاشتې تر دویمې نېټې به دوام وکړي.

سرچینې لیکلي، یادو سیالیو کې د هېواد له پنځو زونونو څخه مس‌عینک، بند امیر، بُست، سپین‌غر او امو لوبډلې ګډون لري چې د ننګرهار په غازي امان‌الله خان او شهید نجیب‌الله تره‌کي کرکټ لوبغالو کې به ترسره شي.

د سرچینې د معلوماتو له مخې، دغو سیالیو کې هره لوبډله په خپل لومړي پړاو کې څلور لوبې ترسره کوي.

وړاندې لیکل شوي، یادو سیالیو کې له پنځو زونونو څخه د کورني کرکټ قراردادلرونکي، د لومړۍ او دویمه درجه ولایتي سیالیو او د افغانستان کرکټ بورډ د ظرفیت لوړونې څانګې اړوند د روزنیزو کمپونو غوره لوبغاړي لوبېږي.

اوسمهال دغو سیالیو کې د بُست، مس‌عینک او د سپین‌غر، بند امیر لوبډلو ترمنځ لوبې روانې دي.