بادغیس کې سېلابونه؛ د یوې ښځې په ګډون دوه کسان مړه شوي

قلعه‌نو (پژواک ۳۰ غویی ۱۴۰۳): بادغیس کې ځایي مسوولین وایي چې په دغه ولایت کې د تېرې شپې سېلابونو له امله د یوې ښځې په ګډون دوه کسان مړه شوي دي.

د بادغیس امنیې قوماندانۍ ویاند صدیق‌الله صدیق پژواک خبري اژانس ته وویل چې تېره شپه د دغه ولایت د قادس او ابکمري ولسوالیو په قادس خوردک او کوکچایل سیمو کې سېلابونه راغلي دي.

هغه وایي چې د دغو سېلابونو په پایله کې د قادس او ابکمرۍ ولسوالیو په قادس خوردک او کوکچایل سیمو کې یوه ښځه او یو سړی مړه شوي دي.

سرچینې ویلي چې سېلابونو ښايي ډېر مالي زیانونه هم اړولي وي.