لوګر کې لسګونه میله وسلې او مهمات کشف او ترلاسه شوي

پل‌علم (پژواک، ۵ غبرګولی ۱۴۰۳): د لوګر امنیتي مسوولین وايي چې د یو لړ عملیاتو په ترڅ کې د دغه ولایت په مرکز او ولسوالیو کې لسګونه میله وسلې او مهمات کشف او ترلاسه شوي دي.

لوګر کې د ۲۰۳ منصوري قول اردو د څلورمې پلې لوا مطبوعاتي مسوول نوروز ځلاند پژواک خبري اژانس ته وویل، د تېرو شپږو میاشتو په ترڅ کې امنیتي او کشفي ارګانونو په مرکز پل‌علم، محمداغه، بره‌کي‌برک، ازرې او خروار ولسوالیو کې عملیات کړي دي.

ځلاند زیاته کړه: «د یادو عملیاتو په ترڅ کې ۱۰ میله کلاشینکوفونه، ۱۰ میله تمانچې، ۸ میله مختلفې درنې وسلې، ۳۰۰ فیره مهمات، ۲۴ فیره مزایل او ۲۰ ډوله نور بېلابېل نظامي تجهزات نیول شوي دي.»

د هغه په وینا، د یادو وسلو او مهماتو په تور یو شمېر کسان هم نیول شوي خو کره ارقام یې نه لري.

هغه همدارنګه زیاته کړه، یادې وسلې او مهمات به د ملي دفاع وزارت د ۲۰۳ منصوري قولي اردو اړوند کشفي او استخباراتي مدیریت ته وسپارل شي.

باید وویل شي چې تېره اونۍ هم د ۲۰۳ منصوري قولي اردو اړوند څلورمې لوا کشفي او استخباراتي مسؤولینو د محمداغې ولسوالۍ په «سرخ‌اب» سیمه کې ۲۲ مزایل او سل متره ثانیه‌سوز نیولي وو.