اسعداباد (پژواک، ۵ غبرګولی ۱۴۰۳): د کونړ په نورګل ولسوالي کې د مزار درې سهیل تنګي سیمې اوسېدونکي وایي چې د دې سیمې روغتیایي مرکز له تېرو دوو میاشتو راهیسې د امکاناتو نشتوالي له امله تړل شوی او له حکومته ورته د پاملرنې غوښتنه کوي.
د کونړ د سهیل تنګي سیمې یوه قومي مشر سلامخان پژواک خبري اژانس ته وویل، د دې سیمې روغتیایي مرکز له تېرو دوو میاشتو راهیسې د امکاناتو نشتوالي له امله خپل خدمات بند کړي دي.
نوموړي وویل: «زموږ سیمه کې تر لس زره ډېر خلک ژوند کوي، غرنۍ منطقه ده، سړکونه یې خراب دي، دوه کاله مخکې راته د یوې موسسې له لوري روغتیایي اسانتیاوې برابرې شوې وې خو اوس بېرته بندې شوې، موږ له ګڼو ستونزو سره مخ یو، خپل ناروغان له اوږده پلې مزل وروسته د ولسوالۍ روغتیایي مرکز ته بیایو.»
د یادې سیمي یو بل اوسېدونکی نصرتالله له اسلامي امارت غواړي چې یاد روغتیایي مرکز ته امکانات برابر او بېرته یې فعال کړي.
هغه وویل: «زموږ غوښتنه دا ده چې بېرته دغه روغتیایي مرکز فعال شي او خلکو ته خدمات وړاندې کړي.»
ورته مهال، د یاد روغتیايي مرکز یو ډاکټر فرمانالله وایي، دغه کلینیک دوه کاله مخکې د عامې روغتیا ریاست په چوکاټ کې د (WORLD) په نوم یوې موسسې په مالي لګښت جوړ شو او په فعالیت یې پیل خو اوس یې د تمویل قرارداد پای ته رسېدلی او د امکانات نه درلودو له امله یې خدمات درولي دي.
نوموړي وویل: «دغه روغتیایي مرکز ته به هره میاشت شاوخوا ۱۸۰۰ ناروغانو مراجعه کوله او درملنه به یې کېده، د شلو په شاوخوا کې ولادتونه به هم دلته کېدل چې د ځایي خلکو لپاره ډېر غنیمت و.»
هغه زیاتوي، اوس د دغه روغتیایي مرکز ټول وسایل او پرسونل پر خپل ځای دي خو یوازې مالي امکاناتو او درملو ته اړتیا لري.
دغه راز، د کونړ د عامې روغتیا رییس قاري مظفر مخلص وایي، هڅه کوي د سهیل تنګي روغتیایي مرکز اوسنۍ ستونزه هواره او بېرته یې فعال کړي.
هغه وايي، د یاد روغتیایي مرکز د تمویل قرارداد له اړوندې موسسې سره پای ته رسېدلی او زیاتوي چې کوښښ کوي د مالي ملاتړ برخه کې له بلې موسسې سره تړون وکړي.
د یادونې ده، سهیل تنګی د نورګل ولسوالۍ یوه لرې غرنۍ سیمه ده چې لاره یې خرابه او اوسېدونکي یې له ساعتونو مزل وروسته اسعداباد ښار ته رسېږي.
GET IN TOUCH
NEWSLETTER
SUGGEST A STORY
PAJHWOK MOBILE APP