کابل (پژواک، ۲۳ غبرګولی ۱۴۰۳): د کابل ښاروالۍ وايي، د لوی اختر د رارسېدو په مناسبت او د تاریخي ارزښتونو د ساتلو په موخه د ښار په مرکزي برخه کې د پښتونستان واټ څلورلارې د بیارغونې او ښکلا چارې پیل شوې.
د کابل ښاروالۍ نن پرخپله اېکس پاڼه لیکلي چې دغه چارې «د سن سکای» ودانیز شرکت په مالي ملاتړ پیل شوې دي.
د کابل ښاروالۍ د ټولنیزو او کلتوري چارو مرستیال حاجي محمدنبي عثماني ویلي، د دې څلورلارې د بیارغولو موخه، د ښاري ښکلا رامنځته کول او د تاریخي ارزښتونو ساتل دي؛ ځکه ښاري ښکلا کولای شي د ښاریانو په رواني لید کې غوره بدلون راولي.
د کابل ښاروالۍ د کلتوري چارو رئیس قاري ولي ګل جواد هم ویلي چې د یادې څلورلارې د بیارغونې په چارو کې د اوبو د یوې نوې دوراني فوارې نصبول، د پخوانیو فوارو بیارغونه، د کاسې چپس کاري، د څلورلارې رنګول، د کټاړو او پلو لارو بیارغونه او د څراغونو نصبول شامل دي.
سرچېنې لیکلي، کابل ښاروالي ژمنتیا لري چې د لویو ټولګټو پروژو د پلي کولو ترڅنګ له عامه تاسیساتو او ملي شتمنیو څخه هم ساتنه وکړي.
Views: 49
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن