فراه کې ناپېژانده وسله‌والو یو کس وژلی

فراه‌ښار (پژواک، ۲ چنګاښ ۱۴۰۳): د فراه حکومتي مسوولین وايي چې ناپېژانده وسله‌والو د دغه ولایت په خاک‌سفید ولسوالۍ کې یو ملکي کس وژلی دی.

دغه خبر د فراه د اطلاعاتو او فرهنګ ریاست رسنیو ته په لېږلې خبرپاڼه کې ورکړی دی.

خبرپاڼه کې راغلي چې ناپېژانده وسله‌والو تېره شپه د فراه خاک‌سفید ولسوالۍ په خوست‌والو کلي کې د دادالله په نوم يو کس په ډزو وژلی دی.

سرچینه زیاتوي چې دادالله د فراه ولایت د فراهرود ولسوالۍ د اب‌خرما کلي اوسېدونکی و خو دا مهال د خاک‌سفید ولسوالۍ په خوست‌والو کلي کې اوسېده.

خبرپاڼه کې دغه راز راغلي چې د پېښې په تړاو تر اوسه څوک نه دي نیول شوي خو په اړه يې پلټنې روانې دي.