د احصایې ملي اداره: آذربایجان د افغانستان له آسان خدمت سره تخنیکي برخه کې همکاري کوي

کابل (پژواک، ۱۳ چنګاښ ۱۴۰۳): د احصایې او معلوماتو ملي اداره وايي، د آذربایجان آسان خدمت مسوولینو د افغانستان له آسان خدمت سره د معیاري خدمتونو وړاندې کولو او تخنیکي برخو کې د همکاریو ژمنه وکړه.

د افغانستان د احصایې او معلوماتو ملي ادارې نن پرخپله اېکس پاڼه لیکلي چې د یادې ادارې د آسان خدمت ریاست سرپرست جهاد ګل پاڅون او د ظرفیت لوړونې برخې مشر احمد الماس د آذربایجان هېواد د آسان خدمت له مرستیال جیهون سلمنوف سره لیدلي.

سرچینې لیکلي، په دغه لیدنه کې چې څه موده مخکې ترسره شوه د تجربو شریکولو او تخنیکي همکاریو په تړاو تر هر اړخېز بحث وروسته د آذربایجان آسان خدمت چارواکو د افغانستان آسان خدمت سره د معیاري خدمتونو وړاندې کولو او په دې برخه کې د تخنیکي همکاریو ژمنه وکړه.

سرچینې زیاته کړې، په افغانستان کې د آسان خدمت ماډل چې تر یوه چترلاندې د بېلابېلو عامه خدمتونو وړاندې کول دي د آذربایجان آسان خدمت ماډل پر بنسټ رامنځته شوی چې په لنډ وخت کې بېلابېل عامه خدمتونه وړاندې کوي.

د سرچینې د معلوماتو له مخې، اوسمهال په کابل ښار کې د آسان خدمت څلور، کندهار او خوست کې یو یو مرکز فعال دي او په نږدې راتلونکې کې به په ځینو نورو لویو ولایتونو کې هم ورته مرکزونه رامنځته شي.