د بلخ – سمنګان پر لویه لار ترافیکي پېښه کې څلور کسان مړه شوي

ایبک (پژواک، ۱۴ چنګاښ ۱۴۰۳): سمنګان کې ځايي مسوولین وايي چې د بلخ – سمنګان پر لویه لار د ترافیکي پېښې له امله څلور کسان مړه شوي او یو بل ټپي دی.

د سمنګان د ترافیکو مدیر قاري محمدنذیر سعد پژواک خبري اژانس ته وویل، یو کرولا موټر چې د مزارشریف له ښاره ایبک ته پر لاره و، د سمنګان د خلم ولسوالۍ په غندي اولګای سیمه کې له سړکه وتلی او چپه شوی دی.

هغه وویل، دغه پېښه تېر مازدیګر شوې چې له امله یې څلور کسان مړه او یو بل ټپی شوی دی.

هغه زیاته کړه چې د پېښې مړي او ټپي کس د خلم ولسوالۍ روغتیايي کلینیک ته لېږدول شوي دي.

د سمنګان د ترافیکو مدیر د دې پېښې لامل د موټر چلوونکي بې‌غوري بللې ده.