اسعداباد (پژواک، ۱۶ چنګاښ ۱۴۰۳): کونړ کې یو شمېر سوداګر وایي، د لومړي ځل لپاره یې له دغه ولایته هندوستان هېواد ته د څه باندې ۹۱ میلیونه افغانیو په ارزښت د ۸ زره ټنه پیازو د لېږد لړۍ پیل کړې ده.
د کونړ ولایت یو شمېر سوداګر وایي، نن یې له دغه ولایت څخه د پاکستان له لارې هندوستان ته د پیازو د لېږد لړۍ پیل کړه چې په وینا یي راتلونکې یوه میاشت کې به اته زره ټنه پیاز صادر کړي.
د کونړ یو سوداګر حبیبالرحمن نن په همدې موخه یوې جوړې شوې خبري غونډې ته وویل: «موږ د مومند په نوم له یوه شرکت سره د څه د پاسه ۹۱ میلیونه افغانیو په ارزښت د ۸ زره ټنه پيازو د لیږد قرارداد لاسلیک کړی چې د پاکستان هېواد له لارې به هندوستان ته صادرېږي.»
هغه زیاته کړه، هڅه کوي د دغه ولایت نورو کرنیزو توکو ته هم په نړۍوالو بازارونو کې د خرڅلاو زمینه برابره کړي.
په همدې حال کې د دغه ولایت د والي مرستیال عبدالله حقاني وویل، هڅه کوي د کرندګرو محصولاتو ته په کور دننه او بهر د خرڅلاو مناسب بازار برابر کړي.
هغه وویل، ټول هېواد کې امنیتي حالت د ډاډ وړ دی او په وینا یې چې سوداګر کولی شي په بېلابېلو برخو کې پانګونه وکړي.
ورته مهال د دغه ولایت کروندګر خوښ دي چې کرنیز توکي یې نړۍوالو بازارونو ته لېږدول کېږي.
د اسعداباد ښار د کرهالې سیمې اوسېدونکي حاجي اجمل وویل:«موږ خوښ یو چې په لومړي ځل د کرونګرو محصولات بهر ته صادرېږي چې په دې سره به نه یوازې سوداګر ښه ګټه لاسته راوړي، بلکې د کرونګرو اقتصادي وضعیت به هم ښه والي ومومي.»
کونړ د هېواد په ختیځ کې یوه غرنی ولایت دی چې کمه کرنیزه ځمکه خو پریمانه اوبه لري او کروندګر یې د کال په څلورو فصلونو کې بېلابېل ډوله کرنیز توکي د هېواد بازارونو ته وړاندې کوي.
Views: 48
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن