کابل (پژواک، ۱۹ چنګاښ ۱۴۰۳): په کابل کې د قزاقستان سفیر ویلي چې هېواد یې له افغانستان سره د ځمکني او هوايي ترانسپورټي اړیکو پراختیا ته لېوال او په دې برخه کې همکارۍ ته چمتو دی.
د ترانسپورټ او هوايي چلند وزارت نن پر خپله اېکس پاڼه لیکلي چې د یاد وزارت سرپرست ملا حميدالله اخندزاده په کابل کې د قزاقستان هېواد له سفیر علیمخان یسین ګیلدییف سره ولیدل.
سرچینه وایي، په ياده لیدنه کې د دوه اړخیزو هوايي، ټرانسپورټي او ترانزیټي اړیکو د پراختیا، د دواړو هېوادونو ترمنځ د سوادګریزو توکو اسانه لېږد رالېږد او نورو اړوند موضوعاتو په اړه خبرې وشوې.
په دغه لیدنه کې د قزاقستان سفیر وويل چې هېواد یې له افغانستان سره د ځمکني او هوايي ترانسپورټي اړیکو پراختیا ته لېوال او په دې برخه کې همکارۍ ته چمتو دی.
د سرچینې د معلوماتو له مخې، د ترانسپورټ او هوايي چلند وزارت سرپرست د قزقستان سفیر ته د هر ډول همکارۍ ډاډ ورکړ.
Views: 23
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن