غزني کې د مور او ماشوم روغتیایي مرکز ته ودانۍ جوړه شوه

غزني‌ښار (پژواک، ۲۰ چنګاښ ۱۴۰۳): غزني ښار کې د مور او ماشوم ځانګړي روغتیایي مرکز ته د شاوخوا ۲۰۰ زره امریکايي ډالرو په لګښت ودانۍ جوړه او ګټې اخیستنې ته وسپارل شوه.

په غزني کې د ناروې کمېټې مسوول امین‌الله حکمت وايي، د مور او ماشوم روغتیایي مرکز ودانۍ پر جوړولو شاوخوا ۲۰۰ زره امریکايي ډالر لګښت راغلی چې نهه خونې لري او پر مجهزو وسایلو سمبال شوې ده.

هغه زیاته کړه، د دغه روغتون د ودانۍ لپاره ځمکه د غزني عامې روغتیا ریاست ورکړې او ودانۍ یې د ناروې کمېټې له لوري جوړه شوې ده.

نوموړي دغه راز زیاته کړه چې یاد روغتون د دغه ولایت په کچه لومړی روغتیایي مرکز دی چې ټول کارکوونکي یې ښځې ټاکل شوې دي او په دې سره به د میندو او ماشومانو د مړینو کچه راټيټه شي.

ورته مهال، د غزني والي حافظ امین‌جان عمري له ټولو کورنیو او بهرنیو موسسو او بنسټونو وغوښتل چې د دغه ولایت په نورو سیمو کې هم دغه ډول روغتیايي مرکزونه جوړ کړي.

د یادونې ده، د یاد روغتیایي مرکز د ودانۍ د پرانیستې مراسمو په ترڅ کې دغه مرکز ته د یوې بلې ودانۍ د بنسټ ډبره هم کېښودل شوه.

د مسوولینو په خبره، نوې ودانۍ به هم د ناروې کمېټې له لوري جوړه شي چې نهه خونې به ولري.

Views: 19