کابل کې نږدې ۸۹۰ میلیون زړې افغانۍ وسوځول شوې

کابل (پژواک، ۲۰ چنګاښ ۱۴۰۳): د افغانستان بانک وايي چې په کابل کې یې ۸۸۹ میلیونه او ۹۲۰ زره زړې او له کاره لوېدلې افغانۍ سوځولې دي.

د افغانستان بانک له لوري په خپره شوې خبرپاڼه کې راغلي چې دغه رقم بانک‌نوټونه د بانک د قانون د ۳۹ او ۴۲ مادو پر بنسټ چې ټول رقمونه بانکنوټونه په کې شامل وو، پرون د ټاکل شوي پلاوي په حضور کې له کره شمېرنې وروسته وسوځول شوې.

د افغانستان بانک دویم مرستیال ملا محمد اخند چې د زړو او سولېدلو بانکنوټونو سوځولو بهیر پر مهال یې خبرې کولې، له خلکو وغوښتل چې د سوداګریزو او اقتصادي راکړو ورکړو پر مهال د بانکنوټونو ساتنې ته پاملرنه وکړي، څو له دې لارې د بانکنوټونو د ژر زړېدو مخنیوی وشي.