لښکرګاه (پژواک، ۲۳ چنګاښ ۱۴۰۳): د هلمند د مرکز لښکرګاه ښار په مرکزي جمنازیوم کې د لسو لوبډلو ترمنځ د فوټسال سیالۍ پای ته ورسېدې.
د یادو سیالیو د پای مراسمو کې د هلمند د اطلاعاتو او فرهنګ رییس حافظ عبدالباري راشد پژواک خبري اژانس ته وویل، د فولاد جام په نوم د فوټسال سیالۍ څه موده مخکې پیل شوې وې چي لسو لوبډلو ګډون په کې کړی و.
نوموړي وویل چې یادې سیالۍ د یوه ملي سوداګر په مالي لګښت جوړې شوې وې.
راشد له نورو سوداګرو هم غوښتنه وکړه چې ورزشکاران وستایي څو ځوانان تشویق او د ورزش په برخه کې ځانګړې لاستهراوړنې ولري.
دغه راز، د فوټسال کمېټې مسوول صدیقالله صدیقي پژواک ته وویل، یاد ټورنمنټ چې یوه میاشت یې دوام وکړ، سباوون هاشمي او قیس غني لوبډلې وتوانېدې پایلوبې ته ووځي چې قیس غني لوبډلې د ۶/۲ ګولونو سباوون هاشمي لوبډلې ته ماته ورکړه او د دغه ټورنمنټ لومړی مقام یې خپل کړ.
یو شمېر ورزشکارانو دغه سیالۍ ګټورې وبللې او له نورو ځوانانو یې غوښتنه وکړه چې د نورو کارونو ترڅنګ ورزش هم وکړي.
د یادو سیالیو یوه ګډونوال عبدالقیوم وویل، د ورزش له امریته مننه کوي چې د دوی لپاره یې دغو سیالیو ته زمینه برابره کړې وه، غوښتنه مو دا ده چې نور ځوانان هم ورزش ته مخه کړي.
Views: 7
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن