کابل (پژواک، ۲۵ چنګاښ ۱۴۰۳): د ریاست الوزرا اداري مرستیال په مشرۍ د احتکار د مخنیوي، له کرونګرو د غنمو د پېرلو او له کورنیو کرنیزو محصولاتو او میوو د استفادې د ترویج په موخه غونډه شوې ده.
ارګ پر خپله اېکسپاڼه لیکلي، دغه غونډه کې چې نن د ریاستالوزرا د اداري مرستیال مولوي عبدالسلام حنفي په مشرۍ ترسره شوه، د بهرنیو چارو سرپرست وزیر مولوي امیرخان متقي او موظف پلاوی ګډون کړی وی.
سرچينې لیکلي، دې غونډه کې د هېواد د میوهجاتو او کرنیزو محصولاتو د استفاې رایجولو پر څرنګوالي، د کرنې سکتور پر پیاوړتیا، د کرنیزو محصولاتو له اړخه د ځان بسیاینې د لاروچارو پر ایجاد، له هېواده بهر د کرنیزو محصولاتو او میوه جاتو د صادراتي برخو پر پراختیا خبر وشوې.
سرچینې زیاته کړې، غونډه کې بڼوالو ته د کورني او بهرني بازار موندنې په موخه د لازمو اسانتیاو پر برابرولو، د کرنې اوبو لګولو او مالدارۍ وزارت له لورې د احتکار د مخنیوي په پار د زرګونه ټنه غنمو د پېرلو، د کروندګرو د تشویق او ملاتړ او د هېواد بازار ته د عرضه کولو تر وخت پورې د پېرل شووغنمو د غوره ساتنې د څرنګوالي په اړه هر اړخیز بحث وشو.
ارګ لیکلي، د غونډې په پای کې له ګاونډیو هېوادونو سره د افغانستان ترجیحي تعرفو په اړه د خبرو ترڅنګ د ذکر شوو مواردو په اړه لازمې پرېکړې وشوې.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن