پر غزه د اسرائیلي ځواکونو وروستي بریدونو کې ۵۷ فلسطینیانو ژوند له لاسه ورکړی

کابل (پژواک، ۲۷ چنګاښ ۱۴۰۳): د فلسطین روغتیايي چارواکو ویلي چې تېره ورځ د اسرائيل هوايي بريدونو کې ۵۷ فلسطینانو ژوند له لاسه ورکړی او يو شمېر نور ټپيان شوي دي.

د رویټرز خبري اژانس د راپور له مخې، فلسطیني چارواکو ویلي چې اسرائیلي ځواکونو پرون د غزې پر سوېلي او مرکزي سیمو هوایي بریدونه کړي.

د فلسطین روغتیايي چارواکو ویلي چې په دغو بریدونو کې ۵۷ کسانو ژوند بایللی دی.

سرچینه زیاتوي چې د رفح ښار په سوېل کې د اسرائیلو بریدونه روان دي.

د رویټرز له خوا په خپره شوې ویډیو کې ښکاري چې د دې سیمې اوسېدونکي ټپیان په خرو او ریکشاګانو کې روغتونونو ته لېږدوي.

د راپور له مخې، حماس ویلي چې اسرائیل د عربي هېوادونو او امریکا په منځګړیتوب د اوربند خبرې او هوکړه له خنډ سره مخ کړي دي.

سرچینه زیاتوي چې اسرائيل د غزې په ځینو سیمو کې د پرمختګ خبره هم کړې ده.

په راپور کې راغلي، د حماس او اسرائیل د جګړې له پیل راهیسې لږ تر لږه ۳۸۷۱۳ فلسطینیانو ژوند بایللی او ۸۹۱۶۶ نور ټپيان شوي دي.