کابل (پژواک، ۲۷ چنګاښ ۱۴۰۳): د مرکزي بانک سرپرست د افغانستان لپاره د ملګرو ملتونو د سرمنشي له استازې سره په لیدنه کې ویلي چې دغه بانک د هېواد په ګوټ ګوټ کې د مالي خدماتو پراختیا ته ژمن دی څو ټول هېوادوال یو شان له دغو خدمتونو برخمن شي.
مرکزي بانک نن (چهارشنبې) د یوې خبرپاڼې په خپرولو سره د افغانستان لپاره د ملګرو ملتونو د سرمنشي له استازې روزا اوتونبایوا سره د دغه بانک د سرپرست نوراحمد اغا د لیدنې خبر ورکړی دی.
سرچینې لیکلي چې په دې کتنه کې دواړه لوري د مالي خدمتونو د پراختیا په اړه غږېدلي دي.
سرچینې زیاته کړې: «په دې لیدنه کې نوراحمد اغا د هېواد په ګوټ ګوټ کې د مالي خدماتو پر پراختیا ټینګار وکړ او هغه یې د هېواد د اقتصادي وضعیت په ښه کولو کې یو مهم لامل وباله، هغه څرګنده کړه چې د افغانستان بانک په ټول هېواد د مالي خدماتو پراختیا ته ژمن دی څو ټول هېوادوال په یو ډول له دغو خدماتو برخمن شي.»
هغه زیاته کړې، مرکزي بانک د کوچنیو پورونو وروکولو یوه مقرره جوړه کړې چې دغه اقدام کولای شي په هېواد کې د مالي خدماتو پراختیا کې مرسته وکړي.
هغه ټینګار کړی چې دې برخې ته د همکارو بنسټونو پاملرنه کولای شي د کاري زمینې په برابرولو او د بېکارۍ کچې په ټيټولو کې ګټور رول ولوبوي.
دغه راز، نوراحمد اغا په هېواد کې د اسلامي بانکدارۍ پر پراختیا ټینګار کړی او په دې برخه کې یې د پرمختللو هېوادونو له تجروبو استفادهمهمه بللې ده.
نوموړي څرګنده کړې چې مرکزي بانک د دې برخې پراختیا ته ژمن دی او د شرعي اصولو په رڼا کې د بانکي او مالي خدمتونو وړاندې کولو په هڅه کې دی.
په همدې حال کې، اوتونبایوا هم په دې لیدنه کې د مالي خدمتونو وړاندې کولو برخه کې د همکارۍ او د بانکداری له پرمختللو بنسټونو سره د اړیکو جوړولو ژمنه کړې او دغه برخه یې د افغانانو لپاره ډېره مهمه بللې ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن