ګردېز (پژواک، ۲۷ چنګاښ ۱۴۰۳): د پکتيا په مرکز ګردېز ښار کې د ۳۵۰ زره امريکايي ډالرو په لګښت اووه رغنيزې پروژې بشپړې او ګټې اخیستنې ته وسپارل شوې.
د يادو پروژو د پرانیستې پر مهال د ګردېز ښاروال حبيبالرحمن منصور وويل، دغه اووه پروژې د ګردېز ښار اړوند سيمو کې د ښاروالۍ تر چتر لاندې د ملګرو ملتونو د بشري استوګنځايونو (UN-Habitat) ادارې د ۳۵۰ زره امریکايي ډالره په لګښت جوړ پلې شوې دي.
د ښاروال په وينا، په دغو پروژو کې يو لوی پول، ۳۶۰ متره استنادي دېوال، ۹۲۰ متره زراعتي کانالونه، ۴۴۰ متره محافظتي دېوال او په ګردېز ښار کې د لاسي توکو پلورونکو ته د ۹۰ غرفو اېښودل شامل دي.
دغه راز، په يادو مراسمو کې د پکتيا مرستيال والي انعامالله صلاحالدين وويل، د تدارکاتو قانون د پېچلتيا له امله ځینې پروژې په ځنډ سره عملي کېږي.
بل لور ته، د ګردېز ښار يوه اوسېدونکي ګلزار زيارمل پژواک ته وويل چې د دغو پروژو په بشپړېدو سره ښار ته د سېلاب اوبو مخه ونيول شوه.
هغه وويل: «مخکې ښار ته ډېر وخت سېلاب راته، اوس ورته دېوال جوړ شو، مخه یې ورته نیولې، دا مشکل به نور حل شي.»
د ګردېز ښاريانو له مؤسسو او مسوولو ادارو غوښتنه وکړه چې د ګردېز ښار د پراختيا او رغونې لپاره بايد نورې پروژې هم پلې کړي.
Views: 12
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن