ترینکوټ (پژواک، ۲۸ چنګاښ ۱۴۳): د اروزګان په ګېزاب ولسوالۍ کې د یوه پله جوړولو چارې پيل شوې چې ۲۹ میلیون افغانۍ لګښت به پرې راشي.
د اروزګان د ګېزاب ولسوال مولوي میرحمزه حنفي پژواک خبري اژانس ته وویل، نن په دې ولسوالي کې د هلمند پر سیند د هدوکګ په نوم د هغه پل جوړولو چارې پیل شوې چې شاوخوا ۷۰ سلنه کارونه یې د مخکني حکومت پر مهال ترسره شوي وو.
حنفي زیاته کړه، د هماغه مهال ځايي مسوولینو له قراردادي شرکته په ناقانونه ډول د پیسو غوښتنه کوله چې له امله یې دغه پروژه نیمګړې پاتې شوه.
هغه زیاته کړه، د یاد پل پر پاتې چارو ۲۹ میلیون افغانۍ لګښت راځي چې د ټولګټو وزارت له لوري ورکول کېږي او ټاکل شوې د شپږو میاشتو په موده کې ګټې اخیستنې ته چمتو شي.
د نوموړي د معلوماتو له مخې، یاد پول ۱۰۰ متره اوږدوالی او ۹ متره سور لري چې په جوړېدو به یې د اروزګان د یو شمېر ولسواليو په ګډون د دایکنډي او بامیان ولایتونو اوسېدونکي هم په اسانۍ ترینکوټ ښار ته تګ – راتګ کولی شي.
ورته مهال، د سیمې اوسېدونکي هم د دغه پله جوړېدو ته خوښ دي او زیاتوي چې له دې سره به یې ترینکوټ ښار ته د تګ – راتګ ستونزې کمې شي.
Views: 6
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن