کابل (پژواک، ۲۹ چنګاښ ۱۴۰۳): د ریاستالوزراء سیاسي مرستیال د رسنیو له مسوولینو سره په ناسته کې ویلي چې حکومت د رسنيو او رسنيزو فعاليتونو ملاتړ کوي او د هغوی هڅې ستایي.
له ارګه په خپره شوې خبرپاڼه کې راغلي چې د ریاستالوزراء سیاسي مرستیال مولوي عبدالکبیر د رسنیو له یو شمېر مسوولینو او د سیاسي چارو له ځینو شنونکو سره وکتل.
دغه کتنه تېره ورځ په سپیدار ماڼۍ کې وشوه.
د سرچینې په وینا، په پيل کې د سياسي چارو شنونکو وویل، له هر څه ورته اسلامي او ملي ارزښتونه لومړیتوب لري او هڅه کوي څو په رسنیز ډګر کې د افغانستان واقعیتونه له خلکو او نړۍ سره شریک او د اسلامي امارت پر وړاندې د ناسمو تبلیغاتو مخه ونیسي.
شنونکو زیاته کړې، که څه هم په هېواد کې د اسلامي امارت له بریا وروسته ډېرې ستونزې حل شوې او اصلاحات راغلي، خو د پرمختګونو لړۍ بايد همدغسې دوامداره وساتل شي.
هغوی څرګنده کړه، د افغانانو ترمنځ ملي یووالی د هېواد د پرمختګ لامل شوی او دغه راز د حکومت او ملت ترمنځ واټن له منځه تللی دی.
د هغوی په خبره، اوسنی نظام په تېره یوه پېړۍ کې بېساری دی، ملت او حکومت بايد د شته اسلامي نظام او سراسري امنیت پايښت لپاره په ګډه کار وکړي.
دغو سیاسي چارو شنونکو او د رسنیو مسوولینو دغه راز زیاته کړې، د سیاسي کارپوهانو او کورنیو رسنیو ملاتړ د اسلامي امارت او افغانستان په ګټه تمامېدای شي.
د ریاستالوزراء سیاسي مرستیال مولوي عبدالکبیر ویلي، اسلامي امارت د مسوول او حاکم نظام په توګه په بهرني او کورني سیاست کې ښه پرمختګونه کړي.
هغه د رسنیو د مسوولینو او سیاسي شنونکو هڅې ستايلې او ویلي یې دي، د ټولو ادارو دروازې د افغانانو پر مخ پرانیستې دي او هېوادوال کولای شي د ستونزو د حل او غوره حکومتولۍ په موخه خپلې مشورې له چارواکو سره شریکې کړي.
د هغه په خبره، اسلامي امارت د مسوول او حاکم نظام په توګه بهرني او کورني سیاست کې ښه پرمختګونه کړي او دا مهال په سیمه او نړۍ کې له یو شمېر هېوادونو سره د رسمي تعامل لړۍ د پراخېدو په حال کې ده، د ملت او حکومت ترمنځ یووالی د کورنۍ سیاست اساسي کرښې دي.
نوموړي ویلي، ا.ا د ګاونډيو هېوادونو په ګډون د نړۍ له هيڅ هېواد سره ستونزې نه غواړي او د دوحې تړون ته ژمن دی.
د غونډې په پای کې مولوي عبدالکبیر ډاډ ورکړ چې حکومت د رسنيو او رسنيزو فعاليتونو ملاتړ کوي او پر وړانديزونو به یې غور وشي.
Views: 31
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن