کابل (پژواک، ۳۱ چنګاښ ۱۴۰۳): ارګ وایي چې له افغان شخصیتونو سره د اړیکو کمېسیون له لوري د پخواني لومړي وزیر د مرستیال ډاکټر عبدالصمد حامد زوی او لور او دغهراز په تېر حکومت کې د خوست د کېپياېف قطعې یو شمېر غړو ته د مصونیت کارتونه ورکړل شول.
ډاکټر عبدالصمد حامد د پخواني لومړي وزیر د مرستيال، د پلان وزير او د کابل پوهنتون د رييس په توګه دندې ترسره کړې دي. نوموړى د دې ترڅنګ د افغانستان د اساسي قانون يو ليکوال، قانونپوه او د سياسي بصيرت او پوهې خاوند و.
ارګ نن پر خپله اېکسپاڼه لیکلي، له افغان شخصیتونو سره د اسلامي امارت د اړیکو کمېسیون له لوري د پخواني لومړي وزیر د مرستیال ډاکټر عبدالصمد حامد زوی او لور ته او په تېره «اداره» کې د خوست د کېپياېف قطعې یو شمېر غړو ته چې په دې وروستیو کې هېواد ته راستانه شوي د مصونیت کارتونه ورکړل شول.
سرچينې زیاته کړې، د یاد کمېسیون د دارالانشا رییس مولوي ذاکر راغلو کسانو ته ښه راغلاست ووایه او زیاته یې کړه چې افغانستان د ټولو افغانانو ګډ کور دی او د هر افغان عزت په خپل کور کې وي.
ذاکر ویلي: «د اسلامي امارت له فتحې وروسته عمومي عفوه اعلان شوې، په افغانستان کې د ارامه او سوکاله ژوند کولو زمینه برابره شوې او هېڅوک د پخوانۍ دندې له امله له ګواښ سره نه مخ کېږي.»
سرچینې ویلي، راغلو کسانو له افغان شخصیتونو سره د اړیکو کمېسیون له همکارۍ مننه وکړه او افغانستان ته پر راتګ او شته امنیت یې خوښي وښوده.
د سرچینې د یادو کسانو له قوله لیکلي، په افغانستان کې د موجود امنيت او ډاډ له وجې ډېر شمېر نور بهر مېشتي افغانان لېوالتیا لري چې بېرته خپل هېواد ته راستانه شي.
دا په داسې حال کې ده چې د روانې جولای میاشتې په دویمه هم له افغان شخصتیونو سره د اړیکو کمېسیون له لوري څو پخوانیو عسکرو او مسوولینو ته چې له امریکا، اروپا او یو شمېر نورو هېوادونو افغانستان ته راستانه شوي وو، د خوندیتوب کارتونه ورکړل شوي وو.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن