غزني کې د ځمکې پر سر شخړه کې یو کس وژل شوی

غزني‌ښار (پژواک، ۶ زمری ۱۴۰۳): د غزني امنیه قومانداني وایي، د دغه ولایت په ګیلان ولسوالۍ کې د دوو کورنیو ترمنځ د ځمکې پر سر شخړه کې یو کس وژل شوی دی.

د غزني امنیې قوماندانۍ ویاند ابوخالد سرحدي پژواک خبري اژانس ته وویل چې دغه پېښه تېره ورځ ماښام د ګیلان ولسوالۍ اړوند د څلي په کلي کې شوې ده.

هغه وویل چې په دغه شخړه کې یو کس په بېلچه وهل شوی او ټپی و چې نن یې د سختو ټپونو له امله ساه ورکړه.

د ده په خبره چې امنیتي کسانو په شخړه کې ښکېل څلور کسان نیولي او له څېړنو وروسته به عدلي ارګانونو ته وسپارل شي.