د هېواد د سړو سیمو ښوونځیو د اوړي رخصتۍ تر لسو نورو ورځو پورې وغځول شوې

کابل (پژواک، ۱۱ زمری ۱۴۰۳): د پوهنې وزارت اعلان کړی چې د هوا ګرمۍ له امله د دولتي او خصوصي ښوونځیو او دیني مدرسو د اوړي رخصتۍ د لسو ورځو لپاره وغځول شوې.

د پوهنې وزارت د نشراتو او عامه اړیکو ریاست نن (پنجشنبه، د زمري ۱۱مه) پر خپله اېکس‌پاڼه لیکلي: «د هېواد د سړو سیمو او ولایتونو د رسمي او خصوصي مدرسو او ښوونځیو مسوولینو، ښوونکو او زده‌کوونکو ته خبر ورکول کېږي چې د پوهنې وزارت د سرپرست د ځانګړي حکم له مخې، د هېواد په سړو سیمو او ولایتونو کې د تودوخې درجې د لوړوالي له امله د اوړي رخصتۍ د زمري میاشتې تر شلمې نېټې پورې تمدید شوې.»

دا په داسې حال کې ده چې د پژواک د یوه خبر له مخې، تېره ورځ د روغتیا نړۍوال سازمان (دبلیواچ‌او) هېواد کې د هوا د تودوخې درجې له ډېرېدو خبرداری ورکړی او خلکو ته یې سپارښتنه کړې چې له ګرمۍ ځان وساتي.