کابل (پژواک، ۱۵ زمری ۱۴۰۳): د جي اووه ډلې هېوادونو د بهرنیو چارو وزیرانو په منځني ختیځ کې له ټولو ښکېلو غاړو غوښتي چې له هر هغه اقدامه دې لاس واخلي چې د تاوتریخوالي د پراخېدو لامل ګرځي.
د رویټرز د راپور له مخې، جي اووه ډلې د وروستیو پېښو په اړه - چې ممکن د لبنان په ګډون په سیمه کې په پراخه کچه ناورین وغځوي - خپله «جدي اندېښنه» څرګنده کړې.
د جي اووه ډلې په بیانیه کې راغلي: «د وروستیو پېښو په اړه خپله شدیده اندېښنه چې کېدای شي په سیمه کې د ناورین د پراخېدو لامل شي، څرګندوو. موږ له ښکېلو لورو غواړو چې له هر ډول اقدامه چې کېدای شي د خبرو اترو لاره خنډ کړي او د ترینګلتیا د پراخېدو لامل شي، ډډه وکړي.»
دغه راز، د جي اووه ډلې هېوادونو د بهرنیو چارو وزیرانو په غزه کې پر اوربند او یرغملشوو د خوشي کولو غوښتنه کړې او د فلسطین له خلکو سره یې د بشري مرستو د ډېرېدو په اړه د یادې ډلې د غړو هېوادونو پر ژمنتیا ټینګار کړی دی.
رویټرز لیکلي، په منځني ختیځ کې تاوتریخوالی چې په غزه کې د اسراییلو د ۱۰ میاشتنۍ جګړې له امله رامنځته شوی، په دې وروستیو ورځو کې په تهران کې د حماس د سیاسي دفتر د رییس اسماعیل هنیه له په نښه کېدو را وروسته، لا پراخ شوی دی.
دا په داسې حال کې ده چې د اکسیوس راپور له مخې، د امریکا د بهرنیو چارو وزیر انتونی بلینکن په جي اووه ډله کې خپلو سیالانو وویل چې ښايي ایران او حزبالله لبنان د دوشنبې په ورځ (د زمري ۱۵مه) پر اسراییل برید وکړي.
ورته مهال، نړۍوالو هوايي شرکتونو په تهران کې د حماس د سیاسي دفتر د رییس اسماعیل هنیه له ترور او د لا پراخو جګړو د احتمال له امله اسراییل او لبنان ته پر خپلو الوتنو بندیز لګولی دی.
د حماس د سیاسي دفتر رییس اسماعیل هنیه د تېرې اونۍ د چهارشنبې پر سهار (د زمري ۱۰مه) په تهران کې په یوه برید کې ژوند له لاسه ورکړ او وروسته په قطر کې خارو ته وسپارل شو. هنیه د ایران د نوي ولسمشر مسعود پزشکیال د لوړې په مراسمو کې د ګډون په موخه دغه هېواد ته سفر کړی و.
د یادونې ده، (G7) ډله د دولتونو ترمنځ یو سازمان دی چې کاناډا، فرانسه، المان، ایټالیا، جاپان، بریټانیا او د امریکا متحده ایالتونه یې غړي هېوادونه دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن