ترینکوټ (پژواک، ۲۱ زمری ۱۴۰۳): د اروزګان یو شمېر اوسېدونکي له اسلامي امارته غواړي چې د اروزګان – کندهار لویه لار په پاخه او اساسي ډول ورغوي خو مسوولین وايي، د دغه سړک خرابوالي ستونزه یې له مرکز سره شریکه کړې او ژمنه ورسره شوې چې د رغولو چارې به یې ژر پیل شي.
د اروزګان ـ کندهار لویه لار چې شاوخوا ۱۶۵ کیلومتره ده، تېرو کلونو کې یې ډېرې برخې ویجاړې شوې، اوس د دې لارې مسافر او موټرچلوونکي یې د جوړېدو غوښتنه کوي.
هغوی زیاتوي، د سړک هغه برخې چې کلونه مخکې جوړې شوې وې، د تېرو جګړو پر مهال او دغه راز د ورښتونو او سېلابونو له امله بېرته ویجاړې شوې دي.
د ترینکوټ ښار یو اوسېدونکی سردارمحمد وایي، لسیزې کېږي پر دې لار تګ راتګ کې له ستونزو سره مخ دي.
هغه وویل: «د لارې هغه دوه برخې چې کلونه مخکې قیر شوې وې، بیرته خرابې شوې دي، موږ ته بېخي ډېر مشکل دی.»
دغه راز، اروزګان – کندهار لارې یو موټرچلوونکی شفیعالله وايي، د دې عمومې لارې د ډېر خرابوالي له امله ډېری وخت په فرعي لارو تګ راتګ کوي.
د دې لویې لارې مسافر وايي، که دغه سړک په پاخه او اساسي ډول جوړ شي، تګ راتګ کې به ستونزې کمې او سفر کې به اساني رامنځته شي.
د محمدولي په نوم یو مسافر وايي، کلونه کېږي د سړک خرابوالي له امله له ستونزو سره مخ دي خو په دې اړه یې تر اوسه چا غږ نه دی اورېدلی.
دوی غوښتنه کوي چې اسلامي امارت دې د دوی ستونزو ته رسېدنهي وکړي او د لارې اساسي جوړېدو ته دې ځانګړې پاملرنه وکړي.
ورته مهال، د اروزګان ځایي مسوولین هم د یاد سړک خرابوالي ستونزه مني خو زیاتوي چې موضوع یې له مرکز سره شریکه کړې ده.
د دغه ولایت د والي ویاند ملا انعامالله وایي، ولایتي ادارې د لارې جوړېدو غوښتنه د مشرتابه په ګډون د ټولګټو چارو وزارت له مسوولینو سره شریکه کړې ده.
هغه وویل، ژمنه ورسره شوې چې ډېر ژر به یې چارې پیل کړي.
د یادونې ده، اروزګان له نورو ولایتونو سره د نښلېدو همدا یوازېنۍ لار لري چې په ژمي کې د سېلابونو له امله په ورځو ورځو د لویو او کوچینو موټر پر مخ تړلې کېږي.
Views: 27
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن