کابل (پژواک، ۲۸ زمری ۱۴۰۳): د اسلامي امارت ویاند ذبیحالله مجاهد د هېواد د خپلواکۍ بېرته اخیستو ۱۰۵مې کالیزې په مناسبت ویلي، د انګرېزانو پر وړاندې د افغانانو مبارزې نه یوازې افغانستان کې ښکېلاک پای ته ورساوه، بلکې د سیمې او نړۍ په کچه اشغال شوو هېوادونو کې یې هم ښکېلاک له ماتې سره مخ کړ.
اسلامي امارت نن یکشنبه (د زمري ۲۸مه) په یوه اعلامیه کې د انګرېزي ښکېلاک د ماتې د ۱۰۵مې کالیزې د را رسېدو له امله مبارکې ویلې ده.
اعلامیه کې راغلي، یو سل او پنځه کاله مخکې افغانانو د علمای کرامو په فتوی او د هغوی تر رهبرۍ لاندې د انګریزي ښکېلاک پر وړاندې جهادي مبارزه وکړه او په پر له پسې توګه یې انګرېزان مات کړل او له خپلې خاورې یې وشړل.
اعلامیه کې دغهراز راغلي: «د بریتانوي استعمار پر وړاندې زموږ د مجاهدو اسلافو نه ستړې کېدونکې جهادي مبارزه نه یوازې افغانستان کې د ښکېلاک د ماتې لامل شوه بلکې د سیمې او نړۍ په سطحه یې په ټولو اشغال شوو او استعمارځپلو ملکونو کې ښکېلاک له ماتې سره مخامخ کړ.»
د اسلامي امارت په اعلامیه کې دغهراز زیاته شوې چې افغانان د خپلو نیکونو په پیروۍ یوه پېړۍ وروسته هم «د فتحې را وستلو» او اشغال ختمولو روحیه لري.
د اعلامیې په پای کې راغلي: «افغانان د قوي ایمان، زړورتوب او جهاد له برکته توانېدلي چې د شوروي او بریتانوي یرغلګرو په څېر د امریکا په مشرۍ غربي یرغل هم مات کړي.»
د یادونې ده چې نن یکشنبه (د زمري۲۸مه) له انګرېزانو څخه د هېواد د خپلواکۍ بېرته اخیستو له ورځې سره برابره ده او امانالله خان په دغه ورځ د افغانستان خپلواکي رسماً اعلان کړه.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن