د افغانستان د فوټبال ۱۷ کلنو ملي لوبډله نن له تاجکستان سره لوبه کوي

کابل (پژواک، ۳۱ زمری ۱۴۰۳): د افغانستان د فوټبال فدراسیون وایي چې د هېواد د فوټبال ۱۷ کلنو ملي لوبډله د مرکزي اسیا (کافا) سیالیو کې نن خپله دویمه لوبه له تاجکستان سره ترسره کوي.

د افغانستان د فوټبال فدراسیون د معلوماتو له مخې، د هېواد د فوټبال د ۱۷ کلنو ملي لوبډله د مرکزي اسیا (کافا) سیالیو په لړ کې نن له تاجکستان سره دویمه لوبه ترسره کوي.

 یاده سیالي د تاجکستان په دوشنبه ښار کې د کابل پر وخت د شپې نهه بجې ترسره کېږي.

که افغان لوبډله دغه لوبه وګټي، نو د دغو سیالیو پای‌لوبې ته به لاره ومومي.

دغه راز، په دغو سیالیو کې د افغانستان په ګډون د تاجکستان، ایران، ازبکستان، قرغيزستان او ترکمنستان د فوټبال د ۱۷ کلنو ملي لوبډلې برخه لري.

د یادونې ده، د افغانستان د فوټبال ۱۷ کلنو ملي لوبډلې وړمه ورځ په خپله لومړۍ لوبه کې قرغیزستان ته دوه په صفر ماتې ورکړه.